स्वार्थको भाषा

स्वार्थको भाषामा

मह घोल्छन् 

मीठो बोल्छन्।

कुकुर

कुकुरझैं डुल्छन् 

काम नहुनेहरु

दाम नहुनेहरु।

अनुगमन

अचानक हुन सक्छु परिवर्तन ,गरिराख 

कुनै सि.आई.डी.परिचालन गरिराख 

जतिखेर पनि घुस खान सक्छु मायाको

बेला-बेला आफैं अनुगमन गरिराख।

शवयात्रा

रातो प्रतीकको दुरुपयोग गर्दै

एक हुल क्रान्तिका जलपधारीहरु 

"लाल"शब्दलाई सलामसंग जोड्दै

रङको बेइज्जत गरिरहेका छन्।

वायु-प्रदुषित गर्दैछन् 

ध्वनि-प्रदुषित गर्दैछन् 

आफ्नो ब्लडप्रेसर बढाउँदैछन्

बल-बुद्धि खर्चिरहेकाछन्।

त्यो बल र बुद्धि पढाइमा खर्चेको भए

बिज्ञान र प्रयोगमा खर्चेको भए

धेरै बैज्ञानिक र शिक्षाविदहरु जन्मिसक्थे

नामी शिक्षकहरु कहलिन्थे

धेरैका नाम विश्वमा चम्किसक्थे

स्वर्णाक्षरले इतिहास कोरिन्थे।

यिनीहरुले भविष्य यसैमा सुरक्षित देखिसकेका छन् 

यसो सोर्स-फोर्स लाएर जागिर पक्का हुने 

ग्याङ-फाइट वा रेप-केसमा जेल परे छुट्टिने

भनसुन गरेर काम सजिलो/छिटो/फत्ते हुने।

महंगीले आकाश छोएको बुझिसकेका छन्।

बाइकमा तेल हाल्न

रेड-लेभलसंग सुकुटी चपाउन  

आफ्नो पकेटबाट सुक्को नजाने।

तर 

नबुझ्नेले पनि बुझिसके-

यो कुनै क्रान्ति होइन

यो कुनै जुलुस होइन।

धेरैले बुझिसके-

शान्तिको हत्या भैसक्यो

र

हत्याराहरु शान्तिको शवयात्रामा छन्।

जलन

अरुको प्रगतिमा मान्छे

जल्दै जल्दै जान्छन् 

गल्दै गल्दै जान्छन्।

जतिखेर पनि

नेपालको राजनैतिक दल

जतिखेर पनि जुट्न सक्छ 

जतिखेर पनि फुट्न सक्छ।

अव्यवहारिक

अव्यवहारिक,असम्भव कुरा अचेल कसले सुन्छ?

हरेक व्यक्ति अरुलाई तान्न अनेक शब्दजाल बुन्छ

मायाप्रेम बिना जमिन भास्ने,नभ खस्ने हुन्न क्यारे 

"तिमी बिना बाँच्न सक्दिन"भन्दैमा यहाँ के हुन्छ?

राजनैतिक दल

बेलून हो राजनैतिक दल

जतिखेर पनि उड्न सक्छ

जतिखेर पनि फुट्न सक्छ।

जिन्दगी

यो जिन्दगी हो साथी!

कहिले रंगीन हुन्छ 

कहिले रंगहीन हुन्छ। 

सेनापति

सहयात्रीको तेश्रो आँखा फुटाएको अलि मजा आएन

राजाकै विरुद्धमा हतियार उठाएको अलि मजा आएन

शासन-बागडोर हातमा लिई अधिकारको दुरुपयोग गरी 

रानीले सेनाहरुसंग आँखा जुधाएको अलि मजा आएन।