बगैंचा

बस्छौ भने छातीलाई

गलैंचा बनाइदिन्छु म

बगैंचा बनाइदिन्छु म।

देश

आँखामा देश छ

नसामा देश छ

कहाँ छैन देश?  

कलामा देश छ।

कसले बिगारे

कल्ले बिगारे भन्नुहोला 

भरौटेले देश बिगारे 

धरौटेले देश बिगारे।

तिरस्कार

सधैं आफैं माथि पर्दा समस्या भएको हो

हद भन्दा तल  झर्दा समस्या भएको हो 

प्रेमको वीउ छरे पो संसार सुन्दर हुन्छ त

अरुलाई तिरस्कार गर्दा समस्या भएको हो।

पदक

ओहदामा बसेकाले आफ्नैलाई पदक दिलाउँछन्

हरे !देख्नेलाई लाज भयो,किन चटक देखाउँछन्?

उडेर कहाँ सफलताको सगरमाथामा टेकिन्छ र

कृकेटरहरु १ रन,२ रन जोड्दै शतक बनाउँछन्।

माया मात्र गर्नेलाई पनि खासै माया लाग्दैन 

उही प्यारो लाग्छ,जो पटकपटक सताउँछन्।

अचेल

भावनाको पखेटा हाली कहाँ-कहाँ जान मन लाग्छ अचेल

कोही मेरो कुरालाई साँचो मान या नमान,मन लाग्छ अचेल 

सक्ने भए काव्यको रम,भोड्का,वियर,व्हिस्की पनि बनाउँथें

काव्यकै ब्रेकफास्ट,लन्च र डिनर खान मन लाग्छ अचेल।

एनिहाउ

पैसावालाहरुको गला थिच्न सके माथि पुगिन्छ

साना-मसिनाहरुलाई किच्न सके माथि पुगिन्छ

"एनिहाउ धन कमाउ"उखानलाई ध्यानमा राखी

ठूला-बडाहरुको गोडा मिच्न सके माथि पुगिन्छ।

लग-इन

कल्पनाको आकाशबाट यथार्थताको धरातलमा झर्न मन छ मलाई 

तिम्रो जिन्दगीको खाली पानामा प्रेमको इन्द्रेणी भर्न मन छ मलाई 

जमाना डिजिटल भैसक्यो साथी,समयले ठूलो फड्को मारिसक्यो

कुनै वेबसाईट जस्तै तिम्रो दिलमा सुटुक्क लगइन गर्न मन छ मलाई।

तँ को होस्?

के गरिबको

स्वाभिमान हुन्न र?

इज्जत हुन्न र?

स्वविवेक हुन्न र?

स्वेच्छा हुन्न र?

स्वतन्त्रता हुन्न र?

के  गरिबले  

लाचार हुनैपर्ने?

झुक्नैपर्ने?

थिच्चिनैपर्ने?

मिच्चिनैपर्ने?

हामी चाहन्छौं 

आफ्नै पौरख र पसिनामा बाँच्न

आफ्नै घरमा गौरवका साथ हाँस्न 

एक-अर्कामा प्रेमपूर्वक रम्न 

द्वन्दलाई बहिस्कार गर्न 

अमनचैनका साथ जिउन।

भन्न पाईन्छ कि पाईन्न?

हामीलाई 

कसैको सहयोग चाहिन्न 

कसैको दया चाहिन्न 

कसैको भीख चाहिन्न।

तैंले दिएको दान लिनैपर्ने के छ र?

खान्न भन्दा पनि मुखमा कोच्ने तँ को होस् र?

सहयोगको बहानामा मेरो घरमा घुस्ने तँ  होस्?

घरमा घुसेर चलखेल गर्न खोज्ने को होस्?

शोषण गर्न खोज्ने को होस्?

लुट्न खोज्ने को होस्?

छिमेकी या दुश्मन?

शान्तिवादी कि आतंकवादी?

तैंले  रिस देखाएर धम्क्याउनुपर्दैन

हामीसँग हिम्मत छ

तैंले बिष देखाएर अँत्याउनुपर्दैन

हामीसंग अमृत छ

तैंले हतियार देखाएर तर्साउनुपर्दैन

हामीसँग यार छ

हामीसँग प्यार छ

हामीसँग बिचार छ।

हाम्रो तागतलाई नजरअन्दाज गर्ने तँ को होस्?

हामीलाई कम्जोर देख्ने तँ को होस्?

हामीले त चिनिसक्यौं-तँ को होस् 

तैंले आफूलाई चिन्न बाँकी रहेछ-तँ को होस्?

जेल

थाहा छैन,तिमीलाई के र कति दिन सक्छु

तिम्रो लागि त काँडामा समेत उभिन सक्छु

स्वतन्त्रता भन्दा बरु बन्धक नै प्यारो लाग्छ 

तिम्रो दिलको जेलमा पनि आनन्द लिन सक्छु।