राजसंस्था र गणतन्त्र

राजसंस्था भनेको गोरेटो हो।गणतन्त्र भनेको फराकिलो कच्ची सडक हो।फराकिलो सडकलाई व्यवस्थित र पक्की बनाउने जिम्मेवारी हाम्रो हो।

चर्चा

क्षमता र प्रतिष्ठाको नभई नोटकै चर्चा छ यहाँ 

दौरा-सुरुवात छायाँमा रही कोटकै चर्चा छ यहाँ 

यो दुनियाँमा कला र गलाको त कुनै चर्चा छैन

केवल कल्कलाउँदो गाला र ओठकै चर्चा छ यहाँ।

हारजीत

गोहीको आँशु झार्न थालेको धेरै भयो

चुनाबमा ठिक्क पार्न थालेको धेरै भयो 

देश,जनताको जित पो हो असली जित

नेता जितेर जनले हार्न थालेको धेरै भयो।

गर्व

आडम्बरको झोली भर्न सकेकोमा गर्व गर्छन् 

रणभूमिमा मार्न र मर्न सकेकोमा गर्व गर्छन् 

जसले हिजो आफ्नो राजा बचाउन सकेनन्

आज दरबारको रक्षा गर्न सकेकोमा गर्व गर्छन्।

डेरा

घामपानीमा ओत दिने चौघेरा हुन् 

भन्नु बेकार छ-सब सम्पत्ति मेरा हुन् 

जाँदा लैजाने केही हैन-ध्रुवसत्य हो

अन्ततः महल पनि अस्थायी डेरा हुन्।