विजयोत्सव

राजनीतिको धरातलमा डुङ्डुङ्ती गन्हाउनेको नाम के हो?

आफ्नो इज्जतलाई लुतो बनाई कन्याउनेको नाम के हो?

यी तीनै प्रश्नको जवाफ एउटै हो,मिलाउनेलाई सलाम छ

जनतालाई हराएर विजयोत्सव मनाउनेको नाम के हो?

भ्यू-टावर

विकास र समृद्धिको सूचक-तिम्रो भ्यू-टावर।

तर तिम्रो भ्यू-टावर मलाई -

लाचार लाग्छ

निकम्मा लाग्छ 

निरर्थक लाग्छ

व्यर्थ लाग्छ।

आकारले ठूलो होला

अग्लो होला

तर उचाइ धेरै कम लाग्छ मलाई।

तिम्रो भ्यू-टावरले 

गाउँवस्तीको कथा बुझ्न सक्दैन 

चुल्हाहरुको व्यथा महसुस गर्न सक्दैन

लाटो छ तिम्रो भ्यू-टावर।

तिम्रो भ्यू-टावरले

टावर जस्तै महलहरु मात्र देख्छ

ठम्याउन सक्दैन-स-साना झुपडीहरु

देख्न सक्दैन जीर्ण संरचनाहरु 

कमजोर छन् तिम्रो भ्यू-टावरका आँखाहरु।

तिम्रो भ्यू-टावरले 

सुन्न सक्छ महंगा गाडीका हर्नहरु मात्र

सुन्न सक्दैन करुणामय ध्वनिहरु

कमजोर छन् तिम्रा भ्यू-टावरका कानहरु।

तिम्रो भ्यू-टावरले 

सुघ्न खोज्छ विदेशी पर्फ्युमका वास्नाहरु मात्र

थाहा पाउनै खोज्दैन पसिनाको गन्ध

पक्षपाती छ तिम्रो भ्यू-टावरको नाक।

ए!लाटो त म पो रहेछु

निर्जीव तिम्रो भ्यू-टावरलाई तथानाम गाली गरेछु!!!

उचाइ

अक्षरहरुको नशा पिएर झुम्ने रहर छ मलाई 

साहित्यको रंगीन संसारमा घुम्ने रहर छ मलाई 

कहिले उकाली चढ्दै,कहिले ओराली झर्दै निर्वाध

सफलताको सर्बोच्च उचाइ चुम्ने रहर छ मलाई।

घाउ

यी आँखामा तिमीले गरेको षड्यन्त्रको जालो छ अझै

यो मुटुमा तिमीले ल्याएको धोकाको भुईँचालो छ अझै

तिमी आफैं भन ए निष्ठुरी मायालु, कुन औषधि लगाउँ?

तनको घाउ निको भए पनि मनको घाउ आलो छ अझै।

बिक्रीमा

टुक्रा-टुक्रा पारी सजाइएको छ ...लाई शोरुम भित्र

सेल्सम्यानहरु कमिसनको होडमा-

तछाड-मछाड गर्दै बार्गेनिङ गर्दैछन् 

महाकालीले दिएको मुनाफा पश्चात् -

थप हौसिएका हुन् सेयरहोल्डरहरु!

बिक्रीमा छ यो देश।

नीति निर्माता

बिर्सिदिंदा काम,कर्तव्य,अविभारा,..पारो तातेर आउँछ 

लाउन त लाउँछन्,ठूलाठूला नारा,...पारो तातेर आउँछ 

पुग्नुपर्ने बिज्ञ,प्राज्ञ त कुनै हालतमा पुग्नै सक्दैनन् त्यहाँ

नीति-नियम बनाउन पुग्छन् हत्यारा,पारो तातेर आउँछ। 

गीत

बेला-बेला महंगो रक्सी बोकेर धाउन नसकेर 

'जी-हजुर' भन्दै झोला बोकी सघाउन नसकेर

योग्य हुँदाहुँदै पनि जागिर पाउन सकिन यहाँ 

जाली,भ्रष्ट नेताको गुणगान गाउन नसकेर।

यो देश

भीमसेन थापाहरुले सेरिएर मरेको देश हो यो

निष्ठा,सुशासन र न्याय छायाँमा परेको देश हो यो 

भन्नलाई सुन्दर,शान्त,विशाल भनेर चिनिए पनि 

जाली,फटाहा,ज्यानमाराले राज गरेको देश हो यो।