बुलेट

भटङटङ बुलेट लिएर हिंड्छन्

जथाभावी धम्की दिएर हिंड्छन्

अचेलका युवा-युवती रक्सी पिई

सडकको बीच हुइँकिएर हिंड्छन्।

बचाउ

कसैको एकदुई कप चिया बचाइदिएँ

कसैको एकदुई बोतल तीनपाने बचाइदिएँ

कसैको एकदुई लोकल भाले बचाइदिएँ

कसैको एकदुई छाक भात बचाइदिएँ

गाउँ पुगेर सुटुक्क फर्किनुको पनि छुट्टै मजा छ।

ह्याक

लागेको छ मनमा ठूलै ठेस,कसले चलाउँदैछ 

अचानक फेरिंदैछ परिवेश,कसले चलाउँदैछ 

सारा गोपनियता भंग भए,देखियो अनौठो दृश्य 

ह्याक भएको छ  मेरो देश,कसले चलाउँदैछ?

एक सेकेन्ड

एउटा गोलीको चालले 

छातीको पहाडलाई छिचोल्दै 

जीवनको ढोकाबाट मृत्युको मुखमा धकेल्न सक्छ

एक सेकेन्डमा।

एउटा टालाको बल जत्रो बमको धमाकाले

हजारौं मानिसलाई चीरनिद्रामा सुताउन सक्छ

एकै सेकेन्डमा।

अनन्तको दूरीसम्म यात्रा गर्न सक्छ

एउटा अन्तर्मनको यात्रीले

एकै सेकेन्डमा।

एकै सेकेन्डमा लिएको गलत निर्णयले

गम्भीर मोडमा पुर्याउन सक्छ

या त सही निर्णयले

सफलताको चुलीमा चढाउन सक्छ।

एकै सेकेन्डको आँखा झिम्क्याइले

कोही कसैको प्रेमको गहिराइमा 

डुबुल्की मार्न बाध्य पार्न सक्दैन भन्ने के ग्यारेन्टी छ?

ठाउँ

आवारा,पागल,दिवाना नाउँ दिए हुन्छ

प्रेमको संसारमा एउटा गाउँ दिए हुन्छ

तिमीसंग सर्वस्व माग्ने त हैसियत छैन 

मुटुको कुनामा सा...नो ठाउँ दिए हुन्छ।