उसको लागि

उनको लागि म त मरिसकें अरे

उनको नजर बाट झरिसकें अरे 

उनीसँग बोल्ने बहानै भएन

अब मेरो बाँच्ने चाहनै रहेन।

तन्त्र

गोरालाई काला बनाउने कुन यन्त्र हो साथी?

सत्यलाई झूट देखाउने कुन  मन्त्र हो साथी

प्रतिस्पर्धाले त खारिन्छ र सक्षम बनाउँछ 

प्रतिस्पर्धीलाई दुश्मन देख्ने कुन तन्त्र हो साथी?

तिमी

ढल्न खोज्दा मेरो जिन्दगी थामिराख्ने थाम हौ 

हजारौं पल्ट जपेपनि ओठ नथाक्ने प्यारो नाम हौ 

अरुले जसरी बुझून् तिम्रो बारेमा,तर मेरो लागि 

कहिल्यै नअस्ताउने गरी उदाएको प्रेमको घाम हौ