(केटा)
ग्यार सेन योनी मार पानी,डासामा चोनी तर पानीलाक्पाला जिम्नी टिंड्वा यिन्, लोङ्नी ङा मोन्डो जिवा क्यानी।
पुज्युङ चिग्राङ यिन् ओई पुज्युङ चिग्राङ यिन्
पुम्फेजा ल्यामु ङेसी याङ जेन्दीका किरुप् यिन्।
(केटी)
टाटु का गेम्नी जुवाला,मिक्सिल ज्याङ्नी टलाला
ज्वाप्तेका ल्हाँस्योक मेलोङ ल ,मिलाम माथोङ झलल।
पुमु चिग्राङ यिन् ओई पुम चिग्राङ यिन्
ख्योक्फेजा ल्यामु ङेसी याङ जेन्दीका किरुप् यिन्।
(कोरस)
पालुकी पुमु चिग्राङ न्वाप
होराङ जोम्नी ङीराङ ज्वाप
-वाङ्म प्वादे द्वाके खोर्किन्वा
आच्युई साक्या चोल्गिन्वा।
(केटा)
थेन्दुक सोनी खाछिसोङ,रिल्दोक सोनी खायासोङ
लामाकी पुमी खाताङ्नी सलाका पुज्युङ खाक्यासोङ
पुज्युङ चिग्राङ यिन् ओई पुज्युङ चिग्राङ यिन्
पुम्फेजा ल्यामु ङेसी याङ जेन्दीका किरुप् यिन्।
(केटी)
खर्कला जोमी प्वाँ सिन्वा,जोमो ल ज्वाप्की क्वाँ सिन्वा
ङ्वाछाङ म्यात दी आज्यु ङालाका टिम्बु द्वाँङ सिन्वा।
पुमु चिग्राङ यिन् ओई पुम चिग्राङ यिन्
ख्योक्फेजा ल्यामु ङेसी याङ जेन्दीका किरुप् यिन्।
(कोरस)
ङिम्खाङ लाम्ला गुत्ताप् यिन्
आई सेर्मुला लुत्ताप् यिन्
सोल्च्याका बिनी मुथुङ्बा
सलाका पुज्युङ थेर्स्युङ्बा।
(केटा)
सम्धिनी द्वाङ्ला ङा तिङ्ला ,लु लानी छ्योम्बु नादिङ ल
होरी क्यावकी ङिङ्ज्या ती फेल्नी याङ डोशी जम्लिङ्ला
पुज्युङ चिग्राङ यिन् ओई पुज्युङ चिग्राङ यिन्
पुम्फेजा ल्यामु ङेसी याङ जेन्दीका किरुप् यिन्।
(केटी)
च्योमोलङ्मा ल खा ग्याप्सोङ,च्योमोछिरिङमा ल ङिम स्यार्सोङ
आच्युकी ङर्मु ताम् कोनी ङे ङिङ् नाङ्ला सेम स्यार्सोङ
पुमु चिग्राङ यिन् ओई पुम चिग्राङ यिन्
ख्योक्फेजा ल्यामु ङेसी याङ जेन्दीका किरुप् यिन्।
(कोरस)
सामा सिम्बु ती खा ल यिन्
पुम्पेजा लेमु ती ङा ल यिन्
दी आच्युकी आल लुसोङ
श्यार्वी पुमुकी सेम कुसोङ।
(केटा)
छ्याप्छ्याप ग्यान्जेन ङ्योन्तेरु,नाम्ज्योक ल सेरा तान्तेरु
ङेमुला जेन्दी क्यासी याङ ङिङखाङ ङिङ्ज्या क्यान्तेरु।
पुज्युङ चिग्राङ यिन् ओई पुज्युङ चिग्राङ यिन्
पुम्फेजा ल्यामु ङेसी याङ जेन्दीका किरुप् यिन्।
(केटी)
स्योसुम टिमा मिसिम्बु ,डु छ्याङ सिर्माङ छ्याङ सिम्बु
आच्युकी सेम ती च्याङ्च्युब् न्वाक,सेमला गासुङ ताम् सिम्बु
पुमु चिग्राङ यिन् ओई पुमु चिग्राङ यिन्
ख्योक्फेजा ल्यामु ङेसी याङ जेन्दीका किरुप् यिन्।
(कोरस)
ओरोङ किरु ङिङ्ज्या म्हाङ
साङ्बा ती खुरु आङी छाङ
फामा ल जिम्खाङ टिनी स्योक
पोङ ताङ फ्यामार खुर्नी स्योक।
