मिसावट

जमानै मिसावटको छ 

तर मलाई टेन्सन छैन।

सामान्य लाग्छ 

दूधमा पानी मिसिनु

महमा सख्खर मिसिनु

तेलमा तेल मिसिनु

तर मलाई टेन्सन छैन।

सामान्यै लाग्छ

दालमा ढुंगा मिसिनु

घिउमा डाल्टा मिसिनु

सुनमा पित्तल मिसिनु 

तर मलाई टेन्सन छैन।

सामान्य लागेको हो

एमाले माओवादीमा मिसिंदा

या भनौं

माओवादी एमालेमा मिसिंदा।

तर एउटा महाटेन्सनको मिसावट छ मेरो लागि

वागमतीमा मान्छेको ढल जस्तो दिमागको मिसावट!

जुलुस

हो म जुलुसमा जान्छु।

सबेरै जागेर 

नाम्लोको झन्डा फहराउँदै

हँसिया/हतौडा बोकेर

कहिले घाँसतिर झम्टन्छु

कहिले ढुँगातिर लम्कन्छु

म संघर्ष गर्छु।

हो म जुलुसमा जान्छु।

"प्रतिकूल समय-मुर्दावाद!"

"मेरो गरिबी-मुर्दावाद!"

"मेरो पेट-जिन्दावाद!"

म नारा लाउँछु।

हो म जुलुसमा जान्छु।

कहिले भेडा-बाख्राहरुलाई सम्बोधन गर्छु

कहिले रुखहरुलाई भाषण दिन्छु  

म सम्मेलन गर्छु।

हो म जुलुसमा जान्छु।

हिम्मत र मिहिनेतको राँको बालेर 

जलाउन जान्छु-समस्याको पुत्ला

तोडफोड गर्न चाहन्छु-अभावको पर्खाल

म क्रान्ति गर्छु।

हो म जुलुसमा जान्छु।

जिन्दगीको दु:ख-सागर तर्न 

म जुलुसमा जान्छु।

आउनुस् ,संगै मिलेर जुलुसमा जाऔं।

वस्ती

यहाँ 

सुन्दरतालाई बिगारेर कुरुप बनाईन्छ  

उज्यालोको मुहारमा हिलो छ्यापेर बर्बाद बनाईन्छ 

लाग्छ-यो मानव-वस्ती हैन।

यहाँ 

असललाई खराब हुन बाध्य पारिन्छ 

इमानलाई  मारिन्छ  

 लाग्छ-यो मनाव-वस्ती हैन।

यहाँ 

प्रेमको पालुवा निमोठिन्छ  

घृणाको बिरुवा रोपिन्छ  

लाग्छ- यो मानव-वस्ती हैन 

यो दानव-वस्ती हो

दानव वस्ती।