सबेरै जागेर
नाम्लोको झन्डा फहराउँदै
हँसिया/हतौडा बोकेर
कहिले घाँसतिर झम्टन्छु
कहिले ढुँगातिर लम्कन्छु
म संघर्ष गर्छु।
हो म जुलुसमा जान्छु।
"प्रतिकूल समय-मुर्दावाद!"
"मेरो गरिबी-मुर्दावाद!"
"मेरो पेट-जिन्दावाद!"
म नारा लाउँछु।
हो म जुलुसमा जान्छु।
कहिले भेडा-बाख्राहरुलाई सम्बोधन गर्छु
कहिले रुखहरुलाई भाषण दिन्छु
म सम्मेलन गर्छु।
हो म जुलुसमा जान्छु।
हिम्मत र मिहिनेतको राँको बालेर
जलाउन जान्छु-समस्याको पुत्ला
तोडफोड गर्न चाहन्छु-अभावको पर्खाल
म क्रान्ति गर्छु।
हो म जुलुसमा जान्छु।
जिन्दगीको दु:ख-सागर तर्न
म जुलुसमा जान्छु।
आउनुस् ,संगै मिलेर जुलुसमा जाऔं।
No comments:
Post a Comment