एकै चिहान

"तेरो बाउ चोर"

"तेरो बाउ दलाल"

"तेरो बाउ देशद्रोही"

"तेरो बाउ एजेन्ट" 

तिमी मलाई गाली गर

म तिमीलाई गाली गर्छु

तिमीहरु हाम्रो सैद्धान्तिक जग हल्लाऊ

हामी तिमीहरुको सैद्धान्तिक जग हल्लाउँछौं

आऊ 

हामी एक-अर्कालाई दोषारोपण गरौं

आऊ

हामी सामाजिक सञ्जालको मैदानमा लडौं

ताकि हाम्रो एकै चिहान होस्।

ढुंगा

म पानी ल्याउँछु 

पानीले मलाई चिनाउँछ।

म औजार चलाउँछु 

औजारले मेरो बस्ती,बाटो सुन्दर बनाउँछ।

म श्रम गर्छु,गराउँछु

भ्रम छर्दिन।

म ढुंगा बोक्छु,बोकाउँछु

ढुंगा हान्न सिकाउँदिन।

म ढुंगा बोक्छु

ढुंगाले मलाई बोक्छ

मेरो बिचार बोक्छ

सिद्धान्त बोक्छ

देश बोक्छ।

ब्यक्ति र दृष्टिकोण

अर्बौं आँखाले देख्ने एउटै सूर्य हो

एउटै चन्द्रमा हो

एउटै पृथ्वी हो।

एकाइसौं शताब्दी हो 

सत्य एउटै हुन्छ,हुनुपर्छ 

असत्य धेरै हुन सक्छन् ।

तर एउटै ब्यक्तिलाई 

कुनै आँखाले मानव देख्छ

कुनै आँखाले दानव।

बैचारिक बिन्दुहरु अनगिन्ती देखिन्छन् 

किन साझा हुन सक्दैन?

काँडा र फूल

काँडा निर्मम हुन्छ

बिषालु हुन्छ 

काँडा देखि डर लाग्छ

सजग भईन्छ

काँडाको प्रहार भयंकर हुन्छ 

तर दुखाइ क्षणिक 

बिर्सन सकिन्छ।

फूल कोमल हुन्छ

सुगन्धित हुन्छ

फूल देखि कुनै डर लाग्दैन

नजिक भईन्छ

फूलको प्रहार नरम जस्तो त हुन्छ

तर मुटुमै हान्छ 

दुखाइ भयंकर र चीर हुन्छ

कहिल्यै बिर्सन सकिन्न।