इन्काउन्टर

मुटुभरी मायाको हिमाल लिएर
हजारौं गोली छेक्न सक्ने छाती फुलाएर
तिमीसंग प्रेमयुद्ध गर्दा
तिमीले एकै नजरको गोली हानेर
इन्काउन्टर गरिदियौ।

तिमीलाई छातीको देब्रे पाटोमा सजाउँदै
मुसुक्क मुस्कुराउँदै
सुस्तरी-सुस्तरी ढल्दै गएर
जमिनमा उत्तानो पर्दा
तिमीलाई उल्टो उभिएको देखें
जुरुक्क उठेर तिमीसम्म पुग्ने ध्येयले
चल्मलाउन खोज्दा सकिन
क्रमश:शिथिल हुँदै गएँ
आँखी-झ्याल धुमिल हुन थाले
वरिपरि घनघोर मेघ मडारियो
सायद तिम्रो मायाको बर्षात हुन हो कि!

मेरा ओठहरु थर्थराउँदै
"पानी-पानी"को सट्टा
"माया-माया" भन्दै थिए
प्रष्ट बोली आइरहेको थिएन
आँखाहरु झिमिक्क नगरी हेरिरहेका थिए
सायद आँखा पूरै सेता देखिन्थे
जसरी प्राण जाँदा भैंसीको आँखा देखिन्छ।

जब तिमी दौडेर आई
थोरै मायाको प्याला पिलायौ
म अर्ध-चेतनबाट पूर्ण-चेतनमा फर्किँदै गएँ
यस्तो लाग्यो कि तिमीले अमृत खुवायौ।

जिजीविषाका तरंगहरु तनभरी फैलिए
रोकिएका रक्तसंचार पुनः सुचारु भए
रोकिएको मुटुको धड्कन
तिम्रै लागि धड्किन थाल्यो
लोचनको रोशनी तेज भयो।

तिम्रो एक स्पर्शले पनि
गोली लागेको घाउ निको भयो
यस्तो लाग्यो-तिमीले संजीवनी बूटी दियौ
यस्तो मलम दलिदियौ जुन कतै पाइन्न
जसमा अलौकित शक्ति छ
त्यो केवल तिम्रै हातमा छ।

कदंकदाचित तिम्रो प्रस्थान भएमा
म फेरि ढल्नेछु
मेरो प्राण तिमीसंगै जानेछ
तसर्थ प्रिया!
यो एकान्तमा
पिरतीको छानो हालेर
केही दिन यतै बसौं  न!