हजारौंको हुलमुलमा
तँछाडमछाड गर्दै
के-के न पाउँला झैं गरी
रातो साडीमा सजिएर
कहाँ हिंडेकी
बाटो बिराएकी त छैनौ?
मेरी पार्वती!
साठी हो कि सत्तरीको
बूढो हो कि जवान
पहिचानै गर्न नसकिने गरी
चाउरिएको छालामा
खरानी घसेर
तिमी जस्ती पार्वतीहरुलाई
रनभुल्लमा पार्दैछन्
ती ढोंगी बाबाहरु!
ब्यापारी बाबाहरु!
त्यता तिर नजाउ
मेरी पार्वती!
जनावरले झैं
लाज शरम पचाएर
बोका झैं ठस-ठस गन्हाउँदै
देखाएर बसेका छन्
सढेका लिंग
शिवलिंगलाई ढोग्न छोडेर
किन ढोग्छ्यौ
बाबाको लिंग?
मेरी पार्वती!
कस्तो पति चाहियो रे?
ठ्याक्कै महादेव जस्तो?
यदि त्यसो हो भने
भाङ-धतुरो खाएर
टिल्ल परेर
खित्का छोडेर बसेको हुनेछु
तिमीले चाहेको जस्तै
बन्ने कोसिसमा हुनेछु
आउ न आउ
मेरी पार्वती!
बरु भन के चाहियो
ईच्छा पूर्ति गर्नेछु
तर मलाई चाहिएन
देवी जस्ती पार्वती
मलाई त भए पुग्छ
तिमी जस्ती पार्वती
तिमीले कष्ट गर्नुपर्दैन
बश पूजा गर मायाको
बाबाको लिंग ढोगे झैं
ढोग्नुपर्दैन मेरो लिंग
हो,साँच्चै भनेको
मेरी पार्वती!
No comments:
Post a Comment