जिन्दगीको रुखबाट

पंक्षी जस्तै उडी नजाउ जिन्दगीको रुखबाट
आँधीबेहरी आएपनि नभागिदेउ दु:::खबाट
संघर्ष नै जिन्दगीको अर्को नाम भनी बुझ
कुनै बेला सुक्छ झरी,चाहे जतिसुकै रुझ।

दिनपछि रात आउँछ,रातपछि फेरि दिन
सुल्झी जान्छ पक्कै पनि समस्या हो एकैछिन
छैन होला संसारमा नदुख्ने हृदय कुनै
छैन होला संसारमा नरुझ्ने नयन कुनै।

सहेरै हजारौं कष्ट बाँचेकै छ तरुल पनि
चट्टानहरु थाकिजालान्,थाक्दैन ऊ कति पनि
पिपलुको जरा हेरी गर्नु तिमी यात्रा तय
मनलाई दह्रो बनाऊ,बोक्नु छैन कुनै भय।