एउटा सरकारी कार्यलयमा
उ अधिकृत अर्थात हाकिम
आमा जमानामै स्वर्ग पुगिन्
सोचे जस्तो हेरचाह
गर्न नसकिने सोचेर
एउटा भएको बाबालाई
बृद्धाश्रममा पुर्याइदियो
नितान्त ढुक्क थियो
बाबाको स्याहार पुगेकोमा
प्रत्येक महिना जान्थ्यो भेट्न
एक घन्टा जति संगै बिताएर
आफ्नो महलमा फर्किन्थ्यो
अति ब्यस्त थियो हाकिम सा'ब
अरु ब्यबसायमा संलग्न भयो
पैसाको पछि रफ्तारमा दौड्यो
पैसाको कालो पर्दाले
उसका आँखा टालिए
उता बृद्धाश्रममा बाबा भने
उचित हेरचाह नपुग्दा
कमजोर हुँदै गयो दिनप्रतिदिन
एकैपटक धेरै रोगहरुको
सिकार हुन पुग्यो
अकालमै स्वार्गारोहण गर्यो
बाबाको प्यारो छोरा
क्षणिक रुपमा शोकमग्न भयो
तत्कालै उ सामान्य भयो
मोजमस्तीमै थियो हिजो सम्म
आज कुसे-औंसीको दिन
अर्थात बाबाको मुख हेर्ने दिन
फेसबुकको भित्तामा
एउटा पुरानो फोटो पोस्ट गरेर
लेखेको रहेछ ज्ञानी छोराले
"मिस यु बाबा।"
