बलात्कार

ए किरा-फट्याङ्ग्रा हो!
खुब साहसी छौ हैन तिमीहरू ?
तिमीहरूको घमण्ड र साहसलाई
हो,म मान्दछु
तर आफ्नो औकातलाई देखाउन
मेरो शीरमाथि नै टेक्नुपर्छ?
आफ्नो शक्ति प्रदर्शन गर्ने ठाउँ
मेरै छाती र शीर भेट्टायौ?
यदि तिमीहरू साच्चिकै
साहसी र बुद्धिमान छौ भने
बाझो जमिनमा अन्न उमार
पत्थर फोडेर हीरा निकाल
तर तिमीहरू त
म माथि चढ्न उद्दत छौ
म माथि चढेर आफूलाई
बहादुरीको संज्ञा दिन्छौ
कति जना चढेर फर्क्यौ
कति जना चढ्ने क्रममै
आफ्नो ज्यानै समर्पित गर्यौ
कहिल्यै फर्केर गएनौ
कति त घाइते भएर फर्क्यौ
तर सबै दोस म माथि थुपार्यौ
म आफैंमा एउटा प्रकृति हु
हो,तिमीहरूको नजरमा
म सुन्दर छु,शित्तल छु
बरफ जमेको छ मेरो तनमा
तर मेरो कारणले
कसैको ज्यान जान्छ भने
त्यो गल्ती मेरो हो र?
तिमीहरूलाई आफ्नो
नाम,दाम,सान चाहिएको छ
कहिलेकाही चल्मलाउछु
खल्बलिन्छ बाहिरी चर्म
हावा र हुरी आएर
हलचल ल्याइदिन्छ
यो विषयमा तिमीहरू
अनबिज्ञ अबश्य छैनौ
तर पनि दुस्साहस गर्छौ
माथि माथि उक्लन
ज्यानको प्रवाह नगरी
घसृरहन्छौ,झुन्डिरहन्छौ
सहानुभूति प्रकट गर्नु सिवाय
केही मद्दत गर्न सक्तिन
मेरो पनि आफ्नै सान छ
आफ्नै इज्जत,मान छ
आफ्नै प्राकृतिक नियम छ
यी नियमहरुको उल्लंघन
म कदापि गर्न सक्तिन
तर म निस्वार्थ
अटल भएर खडा हुन्छु।
कतै डोरी तन्काएर
कतै किला गाडेर
कतै खनेर,कतै भत्काएर
आफ्नो अनुकूलको
मार्ग बनाएका छौ
तैपनि चुपचाप बसेकै छु
हरेक हर्कतहरु सहेकै छु।
म माथि चढेर मज्जा लिउ
मेरो ईज्जत लुट
स्वार्थ पुर्ण गरेर जाउ
तर म निशब्द हुन्छु
म केवल स्तब्ध हुन्छु
किन भने म बोल्न सक्तिन
तिमीहरु सुन्न सक्दैनौ
यदि सुन्ने नै हो भने
कान खोलेर सुन
अनुशासन र धैर्यताको
परिधिमा रहेर पाइला टेक
आफ्नो रहर र ईच्छा
पूर्ति गरेर फर्क
त्यस्तो कदम प्रति मेरो
कुनै गुनासो हुने छैन
तर आफ्नो स्वार्थको निमित्त
मेरो दुरुपयोग नगर
मेरो शरीर छेउछाउ
प्रदुसित र दुर्गन्धित नबनाउ
मलाई पगालेर जल
निर्माण गर्ने धृष्टता नगर
मेरो छातीमा बस्ती नबसाउ
पाउमा शहरीकरण नगर
प्राकृतिक बादलै काफी छ
धूम्रपान गरेर मेरो नजिक
मेरो फोक्सो खराब नबनाउ
यदि मेरो माया लाग्छ भने
मेरो इज्जत गर्छौ भने
मेरो वायुमण्डल स्वच्छ राख
कतै मलाई क्षयरोग लागे
मेरो फोक्सोको उपचार
बिश्वको कुनै अस्पतालमा
कुनै पनि नामी चिकित्सक बाट
सम्भव हुने छैन
र अर्को कुरा
मेरो नाम लाई
बदनाम नगर
हो,म बुझ्छु तिमीहरूको
ईच्छा र चाहनाहरुलाई
त्यसैले त मौका दिन्छु सबैलाई
मेरो शरीर चुम्न
किनकि तिमीहरूलाई
आफ्नो सन्तति ठान्छु
तर कोही यस्ता छन्,
जो बारम्बार आइरहन्छन्
म माथि चढेर
मज्जा लिईरहन्छन्
मलाई बलात्कार गरिरहन्छन्
अनि आफूलाई साहसी ठान्छन्
बहादुरी भई टोपाल्छन्
यसरी नै मेरो इज्जत लुट्यौ
अनि लुटी नै रह्यौ भने
म नाम मात्रको रहनेछु
सगरमाथा!!!