समृद्धि

अहो!कायापलट भएछ नि रातारात!
विपन्नताको खिर्कीबाट सुइँकुच्चा ठोक्दै
दुलोबाट मुसो छिरेझैं छिरिसकेछ
रवि-किरणको पहुँच नभएकै ठाउँमा
प्रकाशको गतिमा घुसिसकेछ समृद्धि!

कतै जादू त भएको हैन?
हिजो सुत्दा नाङ्गै सुतेका थियौं
सखारै आँखा खुल्दा
नयाँ बहुमूल्य पहिरनमा सजिएका रहेछौं
गलामा सपनाको हार
कानमा दुई-दुई तोलाका एयररिङ
हातमा मोटा-मोटा बाला
चारैतिरबाट लपेटिएको रहेछ तन:-आभुषणले!

राती सुत्दा भोकै सुतेका थियौं
पेटमा मुसाहरु भागदौड गर्दै थिए
बालबच्चाहरु निदाउन सकेकै थिएनन्
आज उठ्दा त चौरासी-व्यञ्जनले टन्न ढाडिएको रहेछ पेट
खानाले मातिएर होला झुपु-झुपु निद्रा आइरहन्छ
केटाकेटीहरु बिना पर्वाह निदारहेका छन्
मानौं -अब फेरि भोकले कहिल्यै लेखेट्ने छैन।

सुत्नु अगावै यिनै आँखाले देखेका थिए
मनको भित्ता चर्किएको
रङ खुइलिएर फिका भएको
छानो उधृएको
आत्मघात गरिरहेका थिए शीतका बुँदहरु
अनायासै हामी कुन संसारमा पुग्यौं?
भित्ताहरु उमंगले प्लास्टर गरिएछ
खुशीका रङहरुले लपक्कै पोतिएछ
आस्थाको सुन्दर छानो छाइएछ
बाफ्रे!क्या गतिशीलता!

आम्बो!
रातारात कसले बिछ्याएछ ग्याँसको पाइपलाइन?
के काम अब यो लिपपोत गरिरहनुपर्ने आदिम चुल्हो?
निकाल ती सब सुकेका दाउराहरु,
यो हिउँदको जाडोलाई जलाइदेऊ!
भगाइदेऊ बुढापाकाका दुश्मनलाई!
फालिदेऊ यी धुवाँले धुमिल भाँडाकुँडा
अब पाक्छ नवयुगको नव-परिकार!

धैत!म पनि कस्तो डुकुलट्ठक!
बाहिर हेर्न कस्तो ढिलाइ गरेको?
शुभकार्यमा त चाँडो दृष्टी जानुपर्ने नि
तर मेरो अहोभाग्य!
देखेरै छाडें
आँगनमा त नवयुगले पाइला टेकी पो सकेछ
हामी पर्यौं नै त्यस्तै भाग्यमानी
टोल-टोलमा खटाएछन् सुरक्षाका प्रत्याभूती
पोल-पोलमा चिप्काएछन् समृद्धिका सुचक
हँसाइरहेका रहेछन् दुखियाहरुलाई।

ए ट्यापेहरु!भाग!
अब मुत्ने हैन हाम्रो समृद्धिलाई
ए खातेहरु!उठ!
अब सुत्ने हैन सडकमा
हाम्रो समृद्धिलाई डिस्टर्ब हुन्छ!