मेरो गिदी खाएर पुगेन है तिमीलाई?
मुटु-कलेजो झिकी
भक-भक उसिनेर
पर्परी भुट र
मेरै रक्तको दाल बनाएर
बास्मती चामलको भात सित
मीठो मानेर खाउ।
मेरो गिदी खाएर पुगेन है तिमीलाई?
हड्डीहरु निकालेर
ठूल्ठूला टुक्राहरु पार
प्रेसरकुकरमा दुई-चार सिट्ठी लाउ
पुस-माघको जाडोमा सुप बनाएर
कचौरा भरी-भरी राखेर
सुरुप्प-सुरुप्प पिइदेउ।
मेरो गिदी खाएर पुगेन है तिमीलाई?
छातीको मासु तारी
दनदनी आगो बालेर
तप्प-तप्प बोसो चुहुँदै
मज्जाले सेकुवा पोल र
कुखुराको साँप्रा झैं लुछेर खाउ।
मेरो गिदी खाएर पुगेन है तिमीलाई?
मेरो फलमासु ख्वाप्प-ख्वाप्प काटी
कराइमा शुद्ध तोरीको तेल खारेर
झ्वाँइ-झ्वाँइ पारेर
फ्राइ गरेर रोस्ट बनाउ र
वाइन सित
सितनको रुपमा क्वाप्प-क्वाप्प खाउ
धेरै मजा आउनेछ।
मेरो गिदी खाएर पुगेन है तिमीलाई?
No comments:
Post a Comment