तिम्रो केशको लहरा

तिम्रो केशको लहरामा लहरिंदै लहरिंदै
तिम्रो आँखाको सागरमा तैरिंदै फेरि तैरिंदै
पिरतीको किनारमा पुगेर म बिसाउँछु
जिन्दगीको बाँकी केही पल त्यतै बिताउँछु।

तिम्रो ओठको गुफामा लुक्न देउ खडेरीमा
परेलीको छाता ओढी हिंड्न देउ ती झरीमा
मुहारको दियो बाली हाँस्न देउ अँधेरीमा
छातीका ती पहराले छेक आँधीबेहरीमा।

हिउँदको मौसममा न्यानो काखले सेकाइदेउ
दुश्मनले छोप्न खोजे नङको भाला देखाइदेउ
दाँतहरुका मोती छन् ,सुन्दरताको सुन पनि
लाजका ती गहना छन्,चम्किदिने जून पनि।